O martes, 14 de febreiro, tivo lugar a firma do convenio marco de colaboración entre a Universidade de Vigo e a Fundación Dorzán.
Salustiano Mato, reitor da Universidade de Vigo e Secundino Vidal, Vicepresidente da Fundación Dorzán, asinaron un acordo que ten por obxecto a realización conxunta de actividades e proxectos, así como a aplicación práctica dos coñecementos en proveito da sociedade, e máis concretamente en beneficio das persoas maiores.
“A firma deste convenio achéganos á sociedade, pois nos axudará a transferir o coñecemento que se xera na universidade para solucionar problemas sociais. Esta alianza estratéxica coa Fundación Dorzán, permitiranos dedicar talento universitario a mellorar a calidade de vida dos nosos maiores” indicou Salustiano Mato.
Pola súa banda, Secundino Vidal manifestou que “Para a Fundación Dorzán apoiar á Universidade, á Educación e á Investigación é a mellor forma de mostrar o noso compromiso coa comunidade da nosa contorna, e esperamos seguir colaborando e apoiando actividades ou proxectos conxuntos que contribúan a mellorar o benestar da nosa sociedade en xeral e dos maiores en particular.”
Como primeiro froito deste acordo presentouse a Bolsa Fundación Dorzán, destinada a financiar un proxecto de investigación centrado na área de atención ás persoas maiores, a xeriatría ou a xerontoloxía e dirixida á o alumnado matriculado durante o curso 2016-2017 na Universidade de Vigo - Campus de Ourense e ao persoal docente e investigador (PDI).
Compartir:
